古人話︰「法者，所以興功懼暴也；律者，所以定分止爭也。」可惜香港地情況啱啱相反，法官判案量刑成日畀人批評厚此薄彼甚至獎惡罰善，結果不但平息唔到紛爭，社會反而更加撕裂分化。有人建議成立監督司法系統嘅平台，向法庭建議量刑指引，值得好好考慮。
就講七警傷人罪成被判兩年呢單畸士吖，社會各界質疑刑期過重之餘，更引來警隊大反撲，除咗發起萬人集會撐同袍，甚至有傳內部計劃發起工業行動，都咪話唔大鑊。
即係咁，警察作為執法人員，執行職務時有過火行為，承擔責任無可厚非，問題係呢個世界沒有無緣無故嘅恨，有人主動挑釁警方並且拒捕，正係廣東話俗語所謂「先撩者賤」，結果只係判監五星期，反差強烈成咁，話司法機構冇傾向性，三歲細路都唔信，條氣唔順絕對係人之常情。
司法界最興講呢句︰公義必須得到彰顯，而且是在眾人面前彰顯。之不過眾人睇到嘅係，同樣係襲擊傷人，同樣係「有片有真相」，旺角暴徒磚頭掟到警員爆晒缸，都係判十八個月感化令，呢啲係乜嘢公義？佔領之亂更加唔在講，幕後搞手至今逍遙法外，即使告到上法庭嘅蝦兵蟹將，輕則判社服令，重則坐幾個月，搞到畀人話「警察拉人，法庭放人」；反而民間義士向人稱「漢奸黎」嘅黎智英投擲豬雜，話都冇咁快就被法庭收監。最慘係法官一錘定音權威無上，老虎屁股摸不得，市民嘈多兩嘈，「藐視法庭」罪名笠落嚟，分分鐘監都有得坐，唔怪得連知名大導鬧完法官後縮都縮唔切喇。
照咁講，唔通法官真係大晒？有法律界人士建議效法英國司法制度，成立由法律界及非法律界人士組成嘅獨立量刑指引委員會，制訂對某類案件嘅量刑準則建議，強調咁做嘅好處係拉近司法裁決同民眾間嘅距離，等法官可以更加貼近民情，量刑更加客觀，社會爭拗自然細得多。
正所謂以子之矛攻子之盾，有啲人開口埋口「國際標準」，特別係前殖民地主子，更加係放個屁都香啲，拎英國佬套嘢出嚟塞住班人把口就啱嘅嘞；再講吖，香港法律承襲英國人制度，「拿來主義」就手不過。
正如有網民話齋，法官都係凡人，都會犯錯，點解行政同立法機關都要受監督，唯獨法官大人可以例外？今時今日香港烏煙瘴氣，亂象叢生，講到尾就係因為三權互相拆台，特別係「司法獨大」，淪為打壓異己嘅政治工具，更加可以話係萬惡之源，呢種亂象一日唔改，香港永遠都唔會有運行！