政情：蔣麗芸錫住膝頭 唔着高踭鞋
有明星早前因為膝蓋出現問題要乘坐輪椅出入，平時聲大夾惡嘅立法會議員蔣麗芸（Ann）都嚇親，聲稱為咗膝頭着想，決定唔再着高踭鞋，仲將屋企過百對高踭鞋送晒畀親朋好友，依家只係留番幾十對擺喺屋企欣賞喎！
反璞歸真 棄用名牌
不過啲鞋送咗畀人，又點知啱唔啱人着呢？阿Ann就話自己對腳大細好正常，好多人都着到。除咗送晒啲鞋，阿Ann又話自己近來「反璞歸真」，將唔少舊名牌手袋都送晒畀朋友，自己只係會攞住個百幾蚊嘅袋仔返工，平時用嘅飾物亦都唔係乜嘢名貴嘢。
阿Ann愈講愈興起，話佢同爸爸蔣震都好鍾意同人分享，所以佢以前喺外國讀書時，有朋友都會帶雞蛋、麵包等食物嚟探佢，仲話「捨得」兩個字代表「唔捨又邊有得」咁話喎！唔知阿Ann最近對人生係咪有咩領悟呢？