政情：波哥火遮眼 嗌錯「尹志堅」
立法會財務委員會尋日開咗四個鐘頭會議，審議涉及一百二十四億元嘅基本工程儲備基金整體撥款申請。由於公眾席上有人大聲發言，搞到財委會主席陳健波（波哥）忍唔住要發出警告，結果惹來同議員劉小麗嘅口角之爭。唔知波哥係咪因為咁而心煩氣躁，叫錯議員尹兆堅（肥尹）嘅名做尹志堅添！
死撐讀啱尹兆堅
話說肥尹喺波哥同劉小麗舌戰後發言，波哥可能心情仍未平復，所以叫錯名。肥尹即刻指正，仲話波哥已經唔係首次叫錯。不過，波哥就死撐冇叫錯名。但係翻睇會議片段，佢確係叫錯名，唔認都無用喇！肥尹事後就話，可能「志堅」比「兆堅」普遍，所以容易讀錯，佢亦冇堅持要波哥道歉。
講番會議，泛民要求抽起具爭議項目，肥尹更批評一筆過撥款做法係政治綁架。雖然休會動議被否決，但會議完結前仍未能夠表決。