政情：跳槽問責制升官新捷徑
高官問責制實行多年，願意投身問責行列嘅公務員，隨時可能跳幾級直接做局長，高級過留喺公務員系統慢慢升職嘅官員，簡直有如坐直升機。特首辦主任邱騰華、公務員事務局局長張雲正，到啱啱升正做勞工及福利局局長嘅蕭偉強，都係爬頭做番前上司嘅上司。講開又講，教育局局長吳克儉極大機會冇得留低喺下一屆政府，副局長楊潤雄分分鐘坐正，咁就會成為爬頭升官嘅最新例子嘞！
公務員一貫有論資排輩嘅傳統，雖然升職有快有慢，但係整體嚟講升職都有規有矩。自從推行問責制後，呢個傳統就逐漸被打破。早期由AO轉投問責班子嘅邱騰華，○六年仲做緊新聞處處長，○七年加入問責班子做環境局局長，眨吓眼依家調任特首辦主任。
至於原本屬D6級海關關長嘅張雲正，喺原鄧國威提早離職後接任局長，當時政府亦宣布時任發展局常秘周達明平調出任公務員事務局常秘，周達明原本較張雲正高兩級，但經此一役，反而成為其下屬。
至於啱啱升官嘅蕭偉強，本身屬行政主任（EO）職系，○八至一四年擔任康復專員，當時外界認為佢臨近退休，喺EO職系已經升至頂點。詎料佢轉投問責班子做勞福局副局長，反而官運亨通，最近仲因為勞福局前局長張建宗頂上做政務司司長，而坐正做埋局長。睇番勞福局常秘譚贛蘭喺一二年已出任呢個職位，即係做過蕭偉強上司，依家反而成為其下屬添！
風光背後 有機會一夜消失
所以話，問責官員儼然已成為官場爬頭新捷徑。特區政府今年即將換屆，新嘅問責班底即將上場，吳克儉留低嘅機會微乎其微，外界認為楊潤雄好可能係其中一個接任嘅人選。楊潤雄喺一九九二年先做政務主任，現任教育局常秘黎陳芷娟就比楊潤雄足足早約十年入職，如果楊潤雄真係做咗局長，就明顯爬過黎陳芷娟頭。
不過講真嗰句，官場空降嘅例子唔少，做唔做問責官員亦係自己嘅選擇。問責官員雖然爬頭爬得快，但係喺一夜間消失嘅機會亦唔細。對於視公務員為鐵飯碗嘅人嚟講，或者寧願慢慢嚟，唔想博呢？