中環出更：無懼寒風 示威者斥漢奸黎反中亂港
違法佔領行動發生咗超過兩年，被揭發暗角打人嘅七警都已被定罪及入獄，惟曾經公然參與佔領行動嘅壹傳媒黎智英（漢奸黎）仍然未被檢控，而反漢奸黎嘅示威持續。兩名聲稱自發嘅男女，尋日就因為不滿漢奸黎「禍港殃民」同「反中亂港」，冒住寒冷嘅天氣都仍然帶同橫額去到漢奸黎位於何文田嘅寓所附近示威。
示威牌被吹跌 無阻行動
尋日下午約一時三十分，兩名男女去到漢奸黎嘅寓所附近抗議示威，仲展示印有漢奸黎樣貌以及寫有「反中亂港肥佬黎」、「毒媒橫行 禍港殃民」、「佔中黑手 千古罪人」等字句嘅大型橫額同示威牌。雖然寒風一度吹跌示威牌，都無阻佢哋抗議行動。
針對漢奸黎嘅示威行動自去年起未有停過，自去年六月起，到漢奸黎寓所附近及將軍澳壹傳媒大樓外示威嘅行動最少達一百六十一次，當中自稱霸王國際集團員工及苦主嘅佔十次、正義聯盟佔三次，旅遊業界及其他人士就有一百四十八次。
卓妮