中環出更：珠寶品牌發布會名媛齊撐場
「九十後」靚女作家兼做緊珠寶設計師嘅莊莎娜（Sarah）早前舉行自家珠寶品牌發布會，恒生孫新抱何倍倩（Anina）、全國青聯副主席施榮忻太太鄧慧琦（Jaymee）等城中名媛好友都有到場。珠寶首飾經常令女人愛不釋手，卓妮見Jaymee好專心喺鏡前試戴耳環，仲不時問身邊好友嘅意見，最終買到心頭好。
Jaymee笑稱最鍾意耳環，反而唔係太鍾意戴戒指，事關戒指經常鈎到靚衫線頭，令佢好肉痛喎！講起佢嘅英文名同老公施榮忻嘅英文名Jaime同音，唔知兩人會唔會經常應錯人，好混淆？Jaymee笑笑口話唔會，因為朋友都叫佢琦琦。
當日Sarah嘅爸爸、香港福建同鄉會永遠名譽會長莊哲猛、媽媽駱英英及家姐莊菲娜等人都去打氣。莊哲猛爆料話，Sarah唔只識設計、寫懸疑小說，仲識作曲同唱Rap（饒舌）歌，早前仲差啲被台灣星探發掘去做歌星添！Sarah嘅外婆都喺度，卓妮見佢保養得宜，原來佢早餐食紅棗、芝麻、小米、麥片同牛奶一齊打成嘅熱糊仔，唔落糖，再加上日日瞓晏覺，難怪咁精神。
用手機視頻直擊
綠城電商執董宓琪其（Kiki）同丈夫吳聖傑（Terri）都有到場，Kiki仲即刻用手機視頻直擊，成功幫手賣咗幾條頸鏈同陀飛輪錶，印證依家做生意唔使一定開舖頭。Terri就睇中日本貨勁受歡迎，搭建緊一個商貿批發平台，日後大家就唔使拖篋帶手信喇！
卓妮