中環出更：潮漢葉振南返鄭州祭祖
香港潮屬社團總會名譽顧問葉振南Stephen早前同班啤酒業界友好聚頭，仲話每年大約四月份，佢就會去拜祭祖宗，但唔係返潮州，而係去鄭州參與拜祭黃帝嘅儀式喎。點解係鄭州？佢話潮州人以前都係由鄭州途經福建等地，最後先去到潮州落地生根嘅。而佢身旁嘅拍檔、香港理性飲酒促進會委員林頌齡指自己係福建人，而Stephen就係潮州人，加上潮州人又曾路經福建，所以兩者分分鐘係同鄉喎。
究竟拜祭黃帝嘅儀式係點嘅呢？Stephen就話每年都會有接近兩萬至三萬人一齊參與，非常盛大。佢由朝早八點出門，到儀式完結足足近四小時，當中包括九項習俗，包括放禮炮，獻花籃，淨手上香，敬讀拜文等，最後仲會一齊將紅色嘅氣球放上天，舊年佢就帶咗女兒葉珮斯去觀賞喇，相當壯觀。
至於Stephen兒子葉家麟啱啱升呢做爸爸幾個月，呢個新手爸爸仲抱埋囝囝出嚟同大家打個招呼。講起佢哋家族雖然係做啤酒等酒類生意，其實除咗飲酒之外，佢哋一家人亦好注重健康，熱衷做運動，妹妹葉珮斯仲係游泳好手添！家中擺滿一列妹妹每年游水贏得嘅獎座。
葉嘉齡行山 寓訓練於娛樂
葉家麟嘅姑姐葉嘉齡就同從事啤酒業嘅曾超嫺喜好相近，大家都鍾意行山。葉嘉齡早前喺英國行完山，曾超嫺就經常喺香港行山，希望訓練番自己嘅體能順便享受大自然嘅美態，佢早前同老公由昂平行去鳳凰山，起初覺得好辛苦，但當上次挑戰成功之後，下次就想再下一城，行大東山咁話喎。
卓妮