中環出更：擁護球隊大敗 陳沛然瞓咗無睇
立法會有唔少「波牛」，醫學界議員陳沛然都係其中之一，而佢嘅愛隊就係西甲球隊巴塞隆那。不過，巴塞上星期喺歐聯賽事中大敗零比四，而陳沛然就錯過咗呢場賽事，更直言瞓醒見到比分時嚇親，仲要即刻追問有睇波嘅朋友發生乜嘢事添！
歐聯賽事進入淘汰階段，開始十六強首回合賽事，但賽事往往會喺香港時間深宵進行，所以陳沛然慣常到八強階段先開始睇，因為屆時戲碼比較吸引。佢更解釋，依家要開會，擔心睇完波唔夠精神，會畀傳媒影到開會瞓覺，所以更加少捱夜睇波。
巴塞爆冷輸波 已成習慣
由於愛隊早早遭到大炒，佢亦深知次回合難以反敗為勝，都打定輸數，所以打算今年要破戒，連十六強賽事都要睇，因為擔心一場愛隊嘅歐洲賽都睇唔到囉！雖然愛隊爆大冷，但佢直言已經習慣，因為愛隊強如幾年前成為「六冠王」時，都未能衞冕歐聯，所以會以平常心面對今年嘅成績咁話。
卓妮