電子金融早落後 創新科技大隻講

八十年代有個信用卡廣告口號係咁嘅,「一卡在手,世界通行」,諗唔到家陣已經係互聯網時代,電子支付早已大行其道,香港仍然停留喺「一卡在手」嘅階段,唔少人直情連電子錢包係乜東東都唔知,唔out就假咯。

即係咁,隨着智能手機普及,市場上衍生多種結合手機使用嘅電子支付工具,香港人不嬲自認走在潮流尖端,手機唔新款唔用,款式唔潮唔買,偏偏喺應用電子支付工具方面就落後過人,都算反高潮咯。嗱,有政團進行調查,發現多達四成半市民未聽過乜嘢係電子錢包,只有不足一成七人曾經使用,喺先進地區算係落後,你話係咪同國際大都會呢個朵唔匹配吖?

冇錯,電子錢包會帶來保安及私隱問題,但呢個問題唔係唔可以解決嘅,香港喺呢方面落後於人,長遠必然拖累競爭力。遠嘅唔講,淨係內地咋,支付寶、微信支付帶動無限商機,只要一機在手,網上購物又得,食飯付帳又得,私人轉帳又得,連買機票訂酒店都得,得咗。又好似深圳吖,近年大力推動單車遊,只要用手機下載一個code,就可以喺單車徑沿途租賃及交還單車,方便過香港去單車舖租車多多聲。所以話啫,香港人成日自覺高人一等,郁啲就睇唔起內地,其實係井底之蛙咋。

講起就慚愧咯,二十年前八達通面世,成為領先世界嘅流動支付技術,好多國家爭相向香港取經,風光一時。可惜吖,逆水行舟,不進則退,香港喺呢二十年來不思進取,原地踏步,早就脫晒節咯。反觀內地創新科技突飛猛進,去年流動支付嘅規模已經係美國嘅五十倍,冠絕全球。梗係啦,人哋搞創新科技唔係得把口,而係真正下苦功,甚至將「互聯網+」提升至國家戰略層面,騰訊、華為等科技巨擘紛紛躋身國際舞台,深圳仲做埋中國嘅硅谷添,呢啲咪叫一分耕耘,一分收穫囉。

冇計嘞,港府發展創新科技不嬲葉公好龍,由董建華時代嘅成立創新科技委員會,到曾蔭權時代嘅發展六大優勢產業,再到梁振英政府嘅做大做闊,講就天下無敵,做就無能為力。近年香港創新競爭力每況愈下,國際排名跌跌不休,咪就係敲響警鐘囉,如果唔係有基建及金融優勢呢啲老本墊底,排名肯定更加落後嘅咋。

點都好啦,創新科技係大勢所趨,唔止港府要急起直追,市民亦應與時並進接受新事物。一句到尾,一味食老本只有死路一條,下屆政府邊個做特首都好,千祈咪再坐而論道喇。