有個笑話係咁嘅，牛奶商度咗個廣告口號︰「只要閣下連續一千二百個月飲用本產品，肯定可以長命百歲」，虧佢哋咁都諗得出。如果話呢個廣告只係取巧，咁電視奶粉廣告吹到嬰兒食咗識彈琴，記憶力突飛猛進，仲識排列九大行星模型，直頭誇張到冇人有！
唔講唔知，原來家陣嘅嬰幼兒配方奶粉，無論係營養定健康聲稱，一律無王管，奶粉商鍾意點吹就點吹。舉個例子，廣告成日吹噓令「BB有便便」嘅益生菌，其實只係對成年人同長者有幫助，對嬰兒嘅效用仲有待證實，喺咁嘅情況下，社會各界一直要求當局加強規管。食衞局副局長陳肇始接受本報專訪時表示，港府計劃實施「香港配方奶及相關產品和嬰兒食品的銷售及品質守則」，建議未滿三十六個月嘅嬰幼兒配方奶以及相關產品，唔應該進行任何推廣活動，連透過舉行準爸媽講座進行軟銷都唔准，預計最快今年稍後推行。
即係咁，相關守則一三年已經完成公眾諮詢，喺奶粉商反對下拖到依家至推出，已經慢咗幾拍。本來呢，遲到好過冇到，但不可不知，新守則只係「建議」，並無強制效力，當局話如果情況惡劣唔排除立法規管喎。喂，諗都諗到喇，做生意執輸行頭慘過敗家，見競爭對手落廣告，其他人自然會跟進，咁搞法，新守則容乜易淪為無牙老虎㗎！
你有張良計，佢有過牆梯，除咗傳統電視廣告，今時今日社交媒體咁發達，奶粉商宣傳方法多的是。好似有新手媽媽反映，懷孕期間加入奶粉商嘅「媽媽會」，結果時不時收到「姑娘」嘅跟進電話，對方落足嘴頭，話母乳營養唔夠全面，建議大個咗要試食奶粉，搞到鬼咁困擾。一句講晒，世不患無法，而患無必行之法，新守則推出後，當局點樣落實，點樣處理違反守則嘅奶粉商，先至係重點所在。
奶粉商反對一刀切廣告規管，叫得最口響嘅理由，就係咁做會削弱家長選擇權，講到選擇權，早前有調查顯示，約八成本地媽媽曾嘗試餵哺母乳，但當中大部分人因工作環境及公眾場所欠缺餵哺地點等壓力，結果喺一年內放棄。其實設施欠奉仲係其次，宣傳教育不足，社會風氣跟唔上至係大問題。當女士們喺公眾場所餵哺仲要承受歧視目光，連搭的士都隨時被偷拍，仲講咩選擇吖。所以話，做嘢要做全套，立法規管奶粉銷售固然重要，提供更多母乳餵哺設施亦係應有之義。
始終都係嗰句，嬰幼兒啱啱發育，食品把關幾時都係宜緊不宜鬆，點能夠容許嬰幼兒奶粉廣告誤導㗎。話時話，今屆政府收工在即，都係時候把握最後機會做番齣好戲喇啩！