政情：沙頭角海景公屋 劉國勳都心郁
沙頭角早年「解封」部分地區予公眾，惟靠近內地的沙頭角邨仍屬禁區範圍，神秘色彩依然濃厚。立法會議員劉國勳尋日到沙頭角禁區範圍郊遊抖氣，又指禁區內興建中嘅公屋充滿歐陸風情，更坐擁海景，但申請前提係要有「禁區紙」，一般公屋輪候人士只能望門興嘆。
幾幢興建中嘅房協公屋位於沙頭角禁區內，樓高約五六層，外牆色彩繽紛充滿歐陸風情，旁邊就係平靜海灣，唔講仲以為係臨海別墅，連劉國勳都話想搬入去住。
申請人需持「禁區紙」
不過，要申請呢批公屋單位，前提係要擁有「禁區紙」。一般申請禁區紙需要居於禁區內，但無禁區紙就唔能夠遷入禁區，劉國勳亦笑言有關情況係「有雞先定有蛋先」嘅問題，總之一般公屋輪候人士似乎都係得個「睇」字。
另外，佢又指沙頭角邨有唔少未被開發嘅自然景觀，建議政府再開放多啲禁區範圍，又或者喺假日設立前往禁區嘅港人配額，同時改建部分沙頭角同吉澳嘅廢棄村屋作民宿用途，認為既可促進禁區經濟，亦可令市民假日多啲郊遊選擇。