政情：品茶做實驗 鄧銘心夠講究
喺香港要飲茶非常方便，隨便落街買個茶包已經可以慢慢歎。不過，油尖旺區議員鄧銘心（Michelle）就嫌香港嘅茶包唔夠好飲，即使係同一個牌子，香港版同外國版喺味道上都有明顯差異，搞到佢決定做一個茶包實驗。
外國茶包零舍好味
Michelle飲過喺日本買嘅茶包，又試過去瑞士飲，發現外國嘅茶包零舍好味，所以決定親身做實驗，嘗試搵出味道唔同嘅原因。佢依家就諗緊點樣將實驗結果表達，希望用一個簡單易明嘅方式咁話喇！
咪以為自家做實驗就會馬虎了事，Michelle仲認真到剪開茶包袋，再放入唔同地方所買嘅茶葉去沖，但試後都係覺得外國茶包味道較佳，睇嚟可以排除茶包袋對味道嘅影響喎。
Michelle對茶包非常有研究，但佢就否認自己嘴刁，只係話自己胃口細，唔想浪費咗有限嘅空間，怕錯過美食啫！佢更透露，全家人嘅胃口都一樣咁細，未婚前同老公幫襯快餐店，兩公婆食一個餐都食唔晒，真係有啲誇張喇！