政情:港府絪綁審議 VS 泛民挾持民意 工人飯碗危矣

立法會工務小組日前審議基本工程儲備基金整體撥款申請,民主派議員試圖用拉布,阻止政府將具爭議嘅項目,同其他民生項目綑綁審議,搞到會議進度停滯,遲遲未能批出撥款。署理發展局局長馬紹祥尋日就撰寫網誌,話基本工程儲備基金中唔少項目同民生相關,當中更加有八千個項目進行當中,如果唔可以及時表決,就會有成萬名工人及從業員即時「無糧出」。馬紹祥咁講明顯係用工人飯碗逼民主派讓步,但民主派就計劃打民意牌逼政府將爭議性嘅項目分拆。

馬紹祥:不可能逐一審議

立法會工務小組日前開會討論涉一百二十四億元嘅基本工程儲備基金撥款申請,撥款將有爭議嘅元朗橫洲發展計劃工地平整和道路建設、觀塘音樂噴泉、灣仔摩頓台活動中心、被指係林村天安門嘅林村許願廣場配套設施、馬料水填海等有爭議項目,同其他民生項目綑綁審議。民主派要求政府將有爭議項目分開審議,由於政府拒絕,民主派議員好似朱凱廸同姚松炎等,就發動拉布、休會辯論,以阻止會議進行。

馬紹祥尋日發表網誌批評,立法會工務小組委員會每次開會都爭拗不休,情況令人感到擔憂。佢話政府由八十年代開始,為咗令議會有效運作,都會將小型工程合併審議,制度一向行之有效,如果將整體撥款內九千多個項目逐一提交審議,係不可能任務。佢又話今年提交嘅九千多個項目中,唔少同民生相關,好似有渠務、水務同公路維修工程等,如果四月一日仍然未能及時取得撥款,估計會有過萬名工人同從業員即時「無糧出」,數以百計顧問公司、承包商因政府「拖數」而面臨周轉不靈或財務困難,最終要執笠收場。

雖然馬紹祥用工人飯碗逼民主派讓步,但據了解,民主派並唔會因為咁而屈服,除咗繼續拉布,佢哋亦計劃喺本周六(十八日)工務小組開會期間喺立法會外舉行集會,用民意促政府將有爭議項目分拆。

加會亦徒勞 投票解紛爭

其實政府之前都試過將有爭議項目,同民生項目綑綁交去立法會審議,當時嘅財委會主席陳健波就交由委員就係咪分拆爭議項目投票,都算有效解決紛爭,而同樣嘅方法亦適用喺工務小組。與其互不相讓,不如諗吓其他方案解決,否則再加會都只係徒勞無功啫!

第一手消息請下載on.cc東網iPhone/iPad/Android/Windows Phone Apps