中環出更：柯仔 太太 緣定情人節
聽日就係情人節，唔少情侶都會喺呢一日同另一半留低難忘回憶，立法會議員柯創盛（柯仔）原來係其中一個，佢喺情人節追到依家嘅太太，亦喺情人節求婚同簽紙結婚，真係甜到漏！佢話今個情人節都有唔少活動要出席，但再忙都一定會留番啲時間畀太太，而且已準備好一個驚喜添！係乜嘢？就要賣個關子啦！
柯仔講起當年係做義工認識太太，之後出力追求，太太好文靜，亦都好多男仔追，但當時住藍田嘅柯仔經常接送住秀茂坪嘅太太，足足追咗近年半，喺二月十三日，當日兩人一齊做義工，又一齊睇戲，佢仲記得喺牛頭角向太太表白，過咗十二點，踏入情人節後，太太終於答應做佢女朋友，當晚仲被柯媽媽鬧，做乜咁夜先返屋企添！
顏吳餘英元宵全家包湯圓
之後拍咗十七年拖，期間柯仔服務社區愈嚟愈忙，佢哋一度有分手危機，幸好太太體諒亦相當支持佢嘅工作，其後佢喺一○年嘅情人節求婚，亦喺之後嘅情人節簽紙結婚，可惜當日酒樓酒店都爆滿，要另擇日子擺酒，所以佢至今簽紙同擺酒兩日都會同太太慶祝嘅。
講起情人節，廠商會名譽會長顏吳餘英尋日出席一個婦女團體嘅春節活動時透露，全家十幾人喺剛過去嘅元宵節一齊包湯圓，至於西方情人節就要睇吓老公有冇表示嘞，以往就試過囝囝代表送花嘅。
同場嘅保良局主席郭羅桂珍就話，老公郭少明喺以往嘅情人節都會送花，仲笑指應該係秘書幫佢買嘅，不過今年老公都好有心，特登訂咗餐廳，但佢就希望約埋班朋友喺屋企食飯，所以就取消咗預訂嘞！至於署理勞工及福利局局長蕭偉強就笑言樂意成為萬紫千紅中嘅一片綠葉，而綠葉都竟然成為焦點。講起婦女，佢話自己有一子一女，但男士喺屋企相對而言係弱勢社群，講嘢冇女士咁叻，就算拗贏，太太話「我係唔鍾意呀」，都要順太太意思㗎！
卓妮