美嘅定義雖然每個人都唔同，但係僅憑靚樣同火辣身材，就獲得美嘅稱號，絕對唔足夠。因為要稱得上真正嘅美，唔單止要有外在美，內涵亦相當重要，好似南韓人氣車模洪知妍咁，就係一個堪稱為美嘅好例子。
出生於南韓首爾嘅洪知妍，不但擁有高挑身材及修長美腿，以及令男士一見為之動心嘅美貌，清新可人嘅氣質更係別具吸引力。因為咁嘅緣故，喺佢未入行之前，經常被攝影嘅朋友邀請充當模特兒，雖然當時佢好享受被拍攝嘅樂趣，但並未有諗過以模特兒作為自己嘅事業。
有日佢突然收到一間模特兒經理人公司嘅電話，對方稱喺網上見到佢嘅照片，覺得佢相當有潛質喺模特兒界發展，被人稱讚梗係飄飄然啦，於是佢就膽粗粗嘗試，喺2010年嘅釜山改裝車展中首次以車模身份登場。雖然呢次係佢第一次演出，但由於佢早已習慣喺鏡頭下表現自己，所以唔會感到太大壓力，而且憑住迷人嘅外表及火辣身材，同埋與別不同嘅清新魅力，成為眾人爭相拍攝嘅對象，人氣火速上升，及後獲得賽車車隊嘅垂青，成為車隊嘅專屬賽車女郎。後來佢又化身成Show Girl及電玩展女郎，喺各大電子產品發布會及電玩節上示人，每次例必成為鏡頭嘅焦點。
隨住曝光率及人氣不斷提升，佢嘅一舉一動都備受注目，須知道樹大招風，各種流言蜚語總係會莫名其妙咁出現。不過呢種情況並未喺佢身上出現，因為佢人緣極好，而且從來唔會得罪人，唔少同佢合作過嘅模特兒同攝影師，都不約而同表示佢工作專業，待人處事嘅態度更係值得稱讚，好似有次佢喺賽場被一位清潔嬸嬸整污糟咗件制服，佢不但冇發脾氣，反而主動安慰對方，即使佢被車隊經理責罵，為咗保護清潔嬸嬸，佢情願自己硬啃，都冇講出真相。
雖然大家對洪知妍讚譽有加，但係佢坦言自己都有小姐脾氣，只係甚少喺大家面前表露出嚟而已。現時佢除咗活躍於車展同賽車場外，最近佢擔任網絡商品推廣小姐，為大家推介各種美容及化妝產品，憑住佢嘅美貌做生招牌，相信吸引唔少人支持。問到佢工作嘅重點，佢認為始終以模特兒工作為核心，而佢回想當初從事模特兒工作嘅決定，今日獲得唔錯嘅成績，感到相當安慰。
簡介：洪知妍清新可人嘅氣質，相當吸引，不過佢就謙虛話全靠美容及化妝技巧。事實上，佢對於美容及化妝都有自己一套心得，更樂於喺網上同大家分享，有興趣嘅話不妨向佢請教一下。
網址：https://www.instagram.com/jiyeon4422/
出生地：首爾
身高：175cm
三圍：33、24、34
撰文：魂