政情：瘦削郭偉強 扮財神靠羽絨
新年流流，好多議員都喜歡扮財神向街坊拜年。不過，財神身形高大，最好有個大肚腩，睇起嚟先有福氣，所以唔係人人都可以扮得神似。身材瘦削嘅立法會議員郭偉強就自爆，以前曾經着羽絨打底扮財神，但係有一次農曆新年天氣熱到不得了，令佢吃盡苦頭。
當年熱到出大汗
依家郭偉強係「雙料」議員，佢透露，當年未進身立法會之前，曾有一次以東區區議員身份，試過喺農曆新年落區扮財神。佢自知身形瘦削，所以專登着咗一件厚羽絨打底谷肥自己，希望睇起嚟會豐滿圓潤一啲。
不過，當時一點都唔凍，郭偉強熱到全身出大汗，羽絨吸收「源源不絕」嘅汗水後，變到又濕又重。雖然羽絨可以洗完再着，唔使報銷，但呢個經歷已經嚇到佢決定收山，自此唔敢再扮財神嘞！