政情：新丁狂拉布 核彈變臭彈

其實，喺上一次財委會會議上，陳健波已剪布，限制議員嘅發言時間，但係非建制派議員仍然瘋狂拉布，又提出休會待續好讓政府撤回撥款申請，最終喺爭議聲中結束會議，而財委會喺嚟緊嘅星期五又再審議相關撥款申請，可以預料非建制派會繼續拉布，想拖垮加薪建議。

圍主席台似圍標

陳健波尋日話依家唔少新當選嘅議員，唔熟議事程序，有時連討論邊項議程都唔知道，更經常拉布，有啲爭議嘅議題，例如高鐵，佢未必支持拉布，但亦理解相關做法，但唔少議題爭議未必太大，過分拉布導政「核彈變臭彈」。佢又話唔係針對議員劉小麗，但就質疑墟市係咪重要到值得不斷提出。另外，佢又提到喺主席作出裁決後，有時議員又會不滿，走去包圍主席台，「圍到好似圍標咁」，佢亦已預備隨時要轉房開會，希望轉房唔會成為「新常態」。

為拖垮加薪建議

為咗拖垮加薪建議，非建制派議員瘋狂拉布。陳健波透露，目前收到議員提出二百二十幾項議員議案，其中最多係劉小麗同羅冠聰，分別為九十一項及八十九項，當中唔少離題同可以整合，對於現時提出嘅議案會較寬鬆處理，而當日即時提出嘅，處理就會較嚴謹，預計整體會整合成數十項，但唔會訂下只討論幾多項嘅界線，希望星期六加開嘅會議能夠完成相關表決。唔知佢呢個願望係咪可以成真呢？

另外，政府尋日提交財委會嘅文件指出，按一二年至一六年嘅丙類消費物價指數累積變動，以決定加薪幅度的撥款申請。政府早前建議加幅為百分之十二點四，但因一六年丙類物價指數實際數字已於上月公布，故微調所建議加薪嘅幅度，下調至百分之十二，所引致嘅額外開支亦減至每年一千三百四十萬港元，較原本嘅預算少四十萬港元。