中環出更：日日行山游水 蘇啟聲fit足40年
仁濟醫院尋日舉行「蘇陳偉香長者日間醫院」開幕典禮，捐建人仁濟醫院前主席蘇陳偉香、老公蘇啟聲同家人齊出席撐場。香港人夠晒長壽，但長者想享受人生，始終要有強健體魄。蘇啟聲就好注重健康，朝朝五點幾就起身，行山行個幾鐘，然後游半個鐘水，如是者維持四十幾年，難怪佢身形保持得咁好喇！
仁濟總理孫蔡吐媚（Mary）都好關注健康，佢就鍾意做瑜伽當運動。講起退休後點樣過日辰，Mary話會去旅行享受人生，然後勤力啲去捐助嘅屯門睦鄰社區中心做義工，氹啲老人家開心，令中心「發揚光大」咁話。
嚴徐玉珊新年弄孫為樂
副主席嚴徐玉珊同前主席羅嘉穗都有到場。嚴太家有添丁之喜，佢新抱為嚴家添多名寶貝孫仔，過年期間新抱坐月，所以全家冇外遊，嚴太負責帶大孫女周圍去玩，過一個既溫馨又唔一樣嘅新年。
蘇太女兒蘇凱欣、兒子蘇凱榮及太太Dora都有到場。蘇凱欣下一屆將會加入仁濟董事局做總理，支持即將升呢做主席嘅嚴徐玉珊。
講番日間長者醫院，由於本港人口老化，長者對醫療服務的需求增加，所以蘇陳偉香加碼捐助將長者日間中心面積擴充四倍，添購嶄新電子儀器同復康配套設施，正式易名為長者日間醫院。見咁多人幫助區內居民，喺荃灣住咗三十幾年嘅仁濟當年顧問劉劉寶芝都好開心，遲啲佢亦會捐助仁濟醫院物理治療部改善設施，為區內患者盡一份心力。
卓妮