綠色先鋒：DIY免廢手作
即使是被認為棄之無妨的膠樽、零食包裝盒、紅酒塞，原來只要憑藉一雙巧手，亦可脫胎重生，成為實用家具，或是美觀擺設。自幼熱愛勞作的方奕恆（阿恆），重拾兒時物盡其用精神，經常為垃圾思考出路，近日更在社交網站開設專頁，向同道中人分享廢物重生的秘訣。
「我細個嗰陣，都係有啲咩材料，就用咩嚟整玩具。不過依家可能物質豐盛，大家就冇咗嗰種DIY精神。」從小喜歡手作的阿恆指出，因眼見生活中每日產生大量垃圾，以及不少商品過度包裝，遂着手創作，嘗試為廢物賦予新用途，而不是丟在回收箱，便自覺完成環保責任，「好似膠樽同玻璃樽，就算拎去回收，都可能因為冇商業價值，最終都係去堆填區。但香港又好難買到補充裝，結果愈嚟愈多洗頭水、沐浴露樽。」
社交網專頁 分享心得
「因為我都係不停嘗試，所以成功嘅話，都想同其他人講究竟係點做。」阿恆謙稱，自己並非「手作達人」，在社交網站設立「垃圾手作」專頁，原意是為記錄製造過程，與朋友分享。現時其專頁上作品約二十款，但阿恆說背後有不少失敗之作，例如曾在膠樽上裝上「芭蕉扇」，以改裝成小型吸塵機，但完成後發現吸力微弱，「所以好多網友叫我拍教學片段，但我暫時都唔會，因為唔一定掂，同要剪接技巧。」
加工製品 可融入生活
「垃圾製品」在阿恆家中俯拾可見，證明他的創意並非流於紙上談兵，而是已融入生活。在廚房，有飲料膠樽加工而成的「核突夾」，用來夾起洗碗海綿及食物渣滓；而在客廳，則可見「奶粉罐廁紙盒」，以及用紅酒塞和即棄筷子加工所製的隔熱墊。阿恆解釋，手作有幾個原則，首先必須為家居常見廢物，其次是可以用一般工具處理，之後是製成品必須實際耐用，「同埋要趁阿女瞓咗先可以做，即係要兩個鐘內可以完成。」
「垃圾手作」專頁大受網友歡迎，設立約短短半年，便錄得逾四千六百個讚好（Like），當中最受矚目的製成品，是以紅酒塞、萬字夾，再加上朱古力包裝盒製成的國際象棋，相信可啟發大家，只要多加心思，將賀年禮品包裝盒搖身一變成有用物資。阿恆說，希望專頁能鼓勵更多人嘗試DIY，「咁樣可以幫手減廢，對環境都係一件好事。」
圖：甘偉倫
文：呂耀焜