中環出更：胡志偉陳沛然搵港超隊跟操
新一屆立法會足球隊成立咗一排，不過仲未舉行過比賽。足球隊計劃下個月底舉行首場賽事，到時會邀請政府官員對壘。今屆足球隊新成員胡志偉同醫學界陳沛然（Pierre）尋日就約埋齊齊去練波，仲係跟港超球隊和富大埔操練添！Pierre雖然一直有踢開波，但人哋始終係專業球隊，練練吓佢都自認力不從心，志偉更話完全跟唔到。睇嚟立法會足球隊要快啲搵定外援至得喇！
話力不從心 完全跟唔到
Pierre之所以可以同和富大埔練波都有一段淵源，話說三年前和富大埔有一名球員因傷入院，咁啱去咗Pierre任職嘅醫院求醫。Pierre得知後即刻走去主動拜師，請對方教佢踢波。Pierre話，因為自己冇接受過正式訓練，曾經踢到受傷，所以要補習基本功，好彩對方都肯收佢為徒。不過平日佢哋都係一對一練習，尋日跟操兩個鐘，Pierre直言力不從心喇！
至於同樣從未受過正式訓練嘅志偉，細細個已開始踢波，但尋日就真係完全跟唔到，不過都算大開眼界咁話。
卓妮