中環出更：唔信再有暴亂葉傲冬留港度歲
農曆新年將至，令人聯想起去年大年初一晚爆發的旺角暴亂，而政府部門亦陸續作出戒備，嚴防下周嘅農曆新年會再生暴亂。九龍社團聯會青年事務會尋日喺花墟公園搞咗個「年宵達人比併」嘉賓評審開幕日，見到過往農曆新年均會外遊嘅油尖旺區議會主席葉傲冬，佢亦表明今年會選擇留港過節。莫非佢都要嚴陣以待？
葉傲冬透露，舊年農曆新年期間同家人外遊，惹人羨慕佢外遊得合時，更笑稱佢只顧風花雪月，所以佢今年早就向同事派定心丸，決定唔會喺新年期間外遊。葉傲冬之後解釋，只因今年台灣、日本等鄰近地區的機票價格都比以往昂貴，未知係咪同太遲訂購有關，所以才決定留港度歲。留港原來因為機票問題，睇嚟佢幾有信心暴亂唔會再發生啦！
顏汶羽自爆讀U係「摺友」
原來葉傲冬同民政事務局局長政治助理徐英偉（Caspar）都唔鍾意行年宵，原因同樣嫌年宵太多人。雖然怕人多擠迫，但Caspar依然會同兩個囝囝行年宵，但就會趁剛開業嘅頭幾日去，希望可避開人流咁話。佢更話太太一早下令，禁止佢買無謂嘢，所以同囝囝行年宵時只會飲飲食食，連氫氣球都唔會買喇！
今次活動係希望青年人透過計劃，可以獲得做檔主嘅機會，亦會得到營商意見同培訓，但委員會主席顏汶羽竟然從來無試過搞年宵喎。佢自言讀大學時係「摺友」，所以副修商業都無與同學搞過年宵囉。
轉頭見到九龍社團聯會理事長王惠貞、立法會議員柯創盛同民政事務局副局長許曉暉，許曉暉仲幫襯以示支持，買咗兩個由中學生設計嘅布袋送畀兩個女兒，更千挑萬選揀咗寫上正面語句嘅布袋添！
卓妮