中環出更：議員想當年學樂器為冧女
學習樂器除咗可以陶冶性情、訓練耐性，亦都可以整靚履歷表幫助升學，所以唔少家長都會安排子女上樂器班，不過有立法會男議員學樂器竟然係為咗追女仔。尋日立法會舉行午間音樂表演，一班喺公開比賽奪獎嘅瑪利諾修院學校（中學部）中樂團學生妹齊齊獻技，好多議員駐足觀賞。議員鄭松泰自爆當年於北京攻讀博士學位時，曾經抄電影橋段學吹色士風追女仔，結果都係得個吉囉！
鄭松泰話，當年佢搵咗位深造音樂嘅朋友教佢吹色士風，因為當時有一齣港產電影非常流行，其中一幕係男主角於天台上吹色士風，令佢覺得可以抄橋，借吹色士風追女仔，結果一學就學咗兩年。後來佢發現吹色士風對追女仔效果並唔明顯，所以放棄咗喎！
謝偉俊自認有天分冇耐性
細個被迫學彈鋼琴嘅議員謝偉俊都有類似嘅睇法，佢自認喺音樂方面有天分，更曾經主動學習結他同小提琴，不過就缺乏耐性去練習。但佢認為冇耐性都唔緊要，因為學識樂器可以追女仔就夠喎！
立法會秘書長陳維安（Kenneth）都有到場，佢自爆試過考八級鋼琴試肥佬，唔通佢無音樂天分？Kenneth就話，當年學鋼琴並非出於自願，而且唔鍾意考試嘅模式，因為要不停練同樣嘅樂曲，覺得好沉悶，難怪佢會肥佬喇！
議員葉建源細個就學過口琴，但屋企太窮被迫放棄，所以依家佢好支持學校開各類樂器班畀學生學習，而且收較平嘅學費，避免埋沒學生嘅天分咁話。
卓妮