潘荷尼浪漫人生

如果大家有啲閒錢又有時間嘅話,唔知大家會選擇做乜呢?相信大部分人會去旅行,對於旅遊精潘荷尼嚟講,旅行絕對係人生不可或缺嘅一部分,而佢最鍾意去雪山,除咗欣賞雪景,仲希望可以達成一個夢想。

成熟魅力

出生於首爾嘅潘荷尼,喺2014年參加賽車模特兒比賽,憑住出眾外形成為大家嘅焦點,最後獲得最佳生活態度獎。自此之後,佢成為車展常客,同時喺多個賽車比賽中見到佢嘅身影,從亞洲勒芒系列賽南韓站,到越野車大賽嘅賽場上,佢都以性感造型上陣,成為亮麗嘅風景線。不過講到佢最令人着迷嘅地方,就係身上散發出一股成熟魅力,可能大家會覺得奇怪,南韓車模唔係一直以青春性感作為賣點咩?青春加上性感固然係吸引大眾目光嘅最有力本錢,但係作為一位專業車模,最重要係可以配合到汽車嘅主題,而具有與別不同成熟韻味嘅荷尼,正正可以做到呢點。雖然佢經常以成熟形象示人,但係早前佢喺一個電玩展中,就以可愛青春造型登場,估唔到平時冷艷嘅佢,竟然會有如此活潑一面,亦因為呢次演出之後,令佢嘅發展線路更廣闊。隨住人氣不斷提升,佢又化身平面模特兒喺各個時裝、化妝品及潮流雜誌等亮相,實行以唔同嘅造型,帶畀大家無比嘅視覺享受。

雪上表白

有人懷疑平日成熟冷艷嘅荷尼,竟然有活潑一面,呢啲係咪演技嚟呢?有咁嘅懷疑一啲都唔奇,因為佢唔似其他車模咁喺網上主持直播節目,所以大家未必咁了解佢。其實私底下嘅荷尼並唔係咁冷冰冰,的確係活潑好動,最鍾意去旅行,尤其係歐洲更係佢至愛,每當有時間,佢就會約埋朋友出門。去歐洲咪好貴?荷尼表示模特兒工作時間比較自由,故此可以喺非旅遊旺季出發,機票平之餘,加上佢喜歡住民宿,所以費用唔會太貴。另外,佢最鍾意揀冬天季節去旅行,雖然每次都要帶備大堆禦寒衣服,但總好過熱到一身汗,而佢最愛去雪山,不過佢並唔係為咗滑雪,只係欣賞雪景,同埋用相機影低白雪雪嘅美景。佢自爆一直都有個夢想,就係希望心儀對象喺雪地上向佢表白,浪漫到震喎!唔知呢位心儀對象出現咗未呢?

社交網站

簡介:成熟迷人嘅潘荷尼,一直以嚟都以為佢嘅性格冷若冰霜,原來佢最愛同班朋友去旅行,亦會將旅行時拍攝嘅靚相放喺網上同大家分享。如果想知道阿妹去過邊啲地方,就要Click入佢嘅Instagram睇吓。

網址:https://www.instagram.com/_mn019/

潘荷尼Profile

出生地:首爾

身高:172cm

三圍:33、23、34

撰文:魂