新界鄉議局大樓出租率一直未如理想，加上自落成以來，維修項目甚多，帳簿一直滿江紅。尋日開大會，仲要通過今年多使四十萬元，資助海外顧問委員會歐洲聯絡處嘅經費添！鄉紳一度擔心，呢啲資助數目會變得沒完沒了。
歐洲聯絡處現時位於倫敦唐人街附近，七月搬去一個大型商場，一年嘅經費需要約八十萬港元，處方早前同鄉議局商討時，提出希望當局每年資助一半，而鄉議局主席劉業強就建議，由當局發起籌款，以四、五千萬元買一個英國物業，部分用作歐洲聯絡處，其他面積則用作出租，租金支持聯絡處嘅營運經費。
鄉議局開大會時，多名鄉紳一度擔心，如果多個地方有聯絡處，資助會沒完沒了，唔應該只有當局泵水，當地亦應該諗辦法。副主席張學明解釋，歐洲聯絡處一直有幫唔少海外原居民做登記，依家只係希望當局資助一半經費。
西貢北約鄉事委員會主席李耀斌就建議先畀一年資助，遲啲再籌款買物業。大會最後亦通過，先畀第一年四十萬元嘅資助，七月會組團到英國為新辦事處揭幕。