政情：補選明知輸「志」在參與

青年新政游蕙禎同梁頌恆被取消立法會議員資格後，導致九龍西同新界東都出現議席出缺而需進行補選，當局早前曾話，有關補選相信將喺暑假或之後舉行，曾經參與舊年九月立法會新界東選舉嘅上水鄉事委員會主席侯志強尋日就話積極考慮參加新界東補選，揚言「明知輸、明知傾家蕩產都會走去賭」。

侯志強自比為「病態賭徒」，又話上賭枱係興趣，「明知輸、明知傾家蕩產都會走去賭」，「一係唔好報，報就去，打死罷就」。咁有冇同建制派協調？佢話自己嘅事自己決定，最重要係上枱，贏輸唔係問題，參與先係體育精神。

其實，依家無論建制派同各泛民政黨都部署緊補選，希望攞多一席得一席，以免肥水留入別人田，而翻查紀錄，侯志強喺舊年九月僅取得六千七百多票，若果再參與補選，會唔會分薄咗建制派嘅票源呢？