政情:參觀體院 陸頌雄瘋狂集郵

一班立法會議員尋日參觀香港體育學院,其中勞工界議員陸頌雄就喺facebook上載咗幾張同本地精英運動員嘅合照,成為集郵王!呢位集郵王收穫相當豐富,除咗成功同香港乒乓球一哥黃鎮廷合照,亦捕獲到今屆傑青得主、保齡球運動員胡兆康。

陸頌雄話用咗唔少時間同啲運動員傾偈,仲大讚佢哋文武全才,因為發現佢哋除咗運動了得,學業成績同樣出色。其實陸頌雄嘅囝囝係本地足球隊青年軍隊員,相信他能夠從中取經去教導囝囝。

被院長誤認做「新同學」

講到整個參觀行程最為深刻嘅,就係陸頌雄畀體院院長李翠沙博士誤以為係新加入嘅運動員。陸頌雄估計,因為佢身穿波鞋同輕便服裝,加上身形高挑先引起誤會,但佢都唔排除院長只係想氹佢高興而講笑。佢仲透露,細個時嘅志願係做運動員,今日被誤當係運動員都算滿足咗小時候嘅心願喎。

第一手消息請下載on.cc東網iPhone/iPad/Android/Windows Phone Apps