政情：政府遲交報告 畀位泛民拉布

尋日朝早一開會，運房局官員喺民主派三催四請之下，終於準備咗文件派畀出席嘅議員，但竟然有一百六十五頁紙，當中包括大埔當區交通流量、空氣質素評估等幾份報告。民主派初時都仲肯乖乖哋睇報告問問題，但後來都忍唔住道氣。

「內行人」言論辣「興」議員

民主黨（白鴿黨）鄺俊宇發言時話自己唔係教育局局長吳克儉，一個月睇唔切三十本書，鬧爆政府唔到開會前一刻都唔肯交功課，成百幾頁報告就算一分鐘睇一頁，兩個鐘頭會都一定睇唔晒，好難問到官員問題。朱凱廸亦批評局方遲交功課，搞到議員要好似考TSA咁一邊睇文件一邊草擬問題詢問局方。

運房局淨係派出幾名技術官員應戰，本來全程都答得有板有眼，但畀公民黨（公文袋）陳淑莊問多兩句有關當區交通流量嘅報告內容時，接招嘅土木工程拓展署署長林世雄竟然話份報告本身只係畀「內行人」睇，泛民一聽到就即刻發難。本身係「內行人」嘅建築界姚松炎就即刻出聲話百幾頁報告一個朝早根本睇唔晒，之後社民連梁國雄（長毛）就順勢提出休會動議，阻撓議案通過。

建制派鬧爆浪費時間

建制派就當然唔會畀你得逞啦！工聯會麥美娟同主席盧偉國講，話個議題已傾足六個鐘，如果泛民係都要拉布的話，再加開會議都唔係辦法。何君堯亦鬧爆長毛了無新意，上星期就提中止待續議案，過一個星期又提休會動議，仲話再休會都只會浪費時間，又撐出席官員已經從善 如流提供報告，冇理由再拖落去。

整個會議都未討論完休會動議就要散會，下次又要繼續傾過！最新消息，工務小組喺二月三日再加會，大家都仲係互不相讓，我又唔畀報告你、你又拉布拉死我，睇怕要通過呢項工程都凍過水，大塞車嗰四十項工程，再加會都搞唔掂喇！