中環出更：霧霾殺埋身內地港商頂硬上
呢排香港空氣污染好嚴重，困擾內地多年嘅霧霾終於殺到埋身。中華廠商聯合會（廠商會）早前舉行晚宴，卓妮見到一眾喺內地設廠嘅港商，梗要問佢哋點樣防範。喺內地開環保電鍍廠嘅廠商會會董吳國安（安哥）話，早幾日佢去清遠開大型會議，期間咳得好緊要，惟有飲多啲水，但就搞到成日要去廁所喎！會議完咗眾人例牌喺室外影大合照，但係影極都唔清，可見問題真係幾嚴重。
安哥同做珠寶生意嘅常董沈運龍（Aaron）都話，最近珠三角好多工廠被勒令停產，因為中央環保部門出手治理，但係空氣仍然好差，事關污染源頭唔淨止工廠，仲有燒煤同汽車廢氣等問題，有排搞。空氣咁差，醫生都建議市民唔好喺室外做運動，但係鍾意長跑嘅Aaron冇有怕，繼續喺室外長跑，上個月參加一個十公里慈善跑活動，仲破咗自己紀錄，Aaron笑稱自己「老當益壯」添！
當晚係工展會嘅慶功宴，出席嘅仲有廠商會會長李秀恒、立法會議員吳永嘉、展覽服務公司主席戴澤良、「耳機大王」兼廠商會副會長楊志雄（Johnny）及香港鐘表業總會前主席區宇凡等人。
楊志雄多訂單缺工人
喺內地設廠除咗空氣差要頂硬上之外，仲要面對工人流失率高。最近時興無線耳筒，Johnny嘅公司接單情況好好，但係偏偏遇上春運，工人走咗三分之一，唔知佢哋過完年返唔返嚟，想趕工交貨都唔得！
卓妮