模特兒同偶像明星相同之處，在於佢哋唔單止要有迷人嘅外形，仲要識得點樣吸引鏡頭，成為大家嘅焦點先至有機會上位。不過對於南韓車模閔侑琳嚟講，曝光率絕對唔係佢擔心嘅一環，皆因佢天生外貌出眾，每次出場都成為被拍攝嘅對象！
人靚啲確係唔同啲，一出嚟就成為鏡頭嘅焦點，加上激凸上圍及迷人長腿，難怪閔侑琳喺2013年嘅Korea Speed Festival首次以賽車女郎身份登場時，即成為攝影師爭相拍攝嘅對象，及後其照片喺網上瘋傳，每個男士都被佢嘅玲瓏浮凸身材迷倒。能夠喺短時間內引爆人氣，證明佢潛質優厚、實力非凡。畢業於南韓同德女子大學廣播演藝系嘅侑琳，本身冇諗過做模特兒，喺一次偶然機會下，佢被星探發掘，從此投身模特兒行列。自佢處女登場後，喺各大車展都見到佢嘅蹤影，同時佢以性感造型示人，將火辣身材盡情展現，加埋甜到漏嘅笑容及電力十足嘅眼神，有邊個男人可以抵擋得住呢股魅力呢？侑琳嘅人氣愈嚟愈高，除咗接獲大量拍攝寫真工作外，佢先後喺多個電子商品發布會上現身，又以電競模特兒身份同大家近距離接觸，唔少人都大讚阿妹喺芸芸模特兒之中，最具吸引力。
侑琳除咗外形出眾，原來亦口才了得，喺2015年舉辦第4屆南韓賽車模特兒大賽中獲得最佳才藝獎。傳媒問佢會唔會考慮向演藝界發展？畢業後佢的確有意投身演藝界，但係當佢做咗模特兒後，發現自己愈嚟愈喜歡呢份工作，所以希望喺模特兒界能夠做出好成績，會努力畀心機工作，期待將來喺工作上有更大嘅突破。不過難得阿妹咁有口才，唔喺演藝界發展咪浪費晒？原來佢一直都有計劃，就係學似同行姊妹喺網上主持直播節目，除咗展現口才，仲可以同粉絲交流，讓大家深入了解佢，唔好只係欣賞佢嘅外在美，其內在美亦值得大家欣賞！當然，佢冇封咗自己嘅後門，佢表示如果遇到合適機會嘅話，亦唔排除進軍樂壇。
簡介：閔侑琳外形有幾咁迷人，真係唔使多講，活潑形象又得，高貴氣質亦得，不論佢以萌爆造型示人，定係以車模身份登場，都予人唔同嘅感覺，絕對係可塑性極高嘅模特兒。大家想了解阿妹多啲，就要Click入佢嘅IG啦！
網址：https://www.instagram.com/rinrin0926/
出生地：首爾
身高：171cm
三圍：35、24、34
撰文：魂