不甘寂寞嘅「民主阿婆」、前政務司司長陳方安生，經常對香港時局指指點點，佢尋日就以「香港二○二○」召集人身份，向選委建議十個向特首參選人提出嘅問題，要求選委以參選人對問題嘅反應決定投票取向，又認為泛民選委唔應該投白票。之不過，民主阿婆唔係選委，所謂「不在其位、不謀其政」，佢憑乜身份喺度指手畫腳？
民主阿婆向傳媒講佢提出嘅十條問題，包括特首參選人對守護香港核心價值、對「八三一決定」及《基本法》廿三條等問題嘅睇法，佢又要求選委考慮參選人對提問嘅反應，先再決定投票取向。
對於有人提出選舉特首時投白票，佢表明反對，又話選委應集中票源，以策略性方式盡量發揮影響力，選出捍衞一國兩制和核心價值嘅特首，又話目前已有足夠選擇，泛民唔應該派人出選特首，講到自己有份選咁。
至於佢前日自爆將喺下星期出席美國候任總統特朗普嘅就職典禮，佢話自己獲熟悉嘅美國共和黨朋友邀請出席，認為自己獲邀係因為美國嘅朋友都知道佢推動民主嘅立場。佢又話行程主要係見老朋友，亦會了解新政府就一個中國同中美關係嘅看法。佢未知會唔會見官員，又話相信特朗普對香港嘅大方向唔會有轉變。