政情：郭炳江父子睇北極光度聖誕

早前捲入新地貪污案嘅新地前聯席主席郭炳江，喺舊年七月獲准保釋等候上訴，新地執行董事郭基煇尋日喺一個場合中透露，喺啱啱過去嘅聖誕節同爸爸郭炳江去咗芬蘭旅行慶祝，一家人睇北極光，圍埋傾偈同飲熱朱古力，好開心，亦好感恩。

郭基煇話今次係三年以嚟首次嘅旅行，一家人到芬蘭七日欣賞北極光，佢話北極好早天黑，下晝兩點開始已經天黑，「無咩嘢做，一家人就圍埋一齊傾偈，飲熱朱古力，好開心。」佢又話本來過去兩年嘅佳節都唔想離開香港，認為只有爸爸一個人喺香港係唔開心嘅，但爸爸就經常鼓勵佢去旅行，所以佢都有外遊。

另外，舊年舉辦嘅「新地公益垂直跑-勇闖香港ICC」及贊助「新鴻基地產香港單車節」，兩個活動連同新地額外捐助，共籌得八百六十萬元，善款會捐助多個團體，包括香港公益金、社聯同香港小童群益會等。

講到地產市道，郭基煇形容今年係地產最辛苦嘅一年，主要因為私宅供應量料達到二萬至三萬伙，競爭大，加上高地價導致利潤下跌，以及預期美國加息等因素。對於低收入人士難以買樓，佢希望政府能夠增加公屋同居屋供應量。