政情：政府跛腳鴨官員Hea等拉閘
盛傳有意參選下屆特首嘅財政司司長曾俊華（鬍鬚曾）辭咗職咁耐，中央都未批落嚟，而另一個有機會參選嘅政務司司長林鄭月娥（林鄭），亦都傳出會喺日內辭職，政府一時間唔見咗兩個熟手司長實搞到「立立亂」，就連立法會今日辯論有關討論對下任特首期望嘅動議，都無官員肯出席，簡直就變咗「跛腳鴨」政府，令到提出呢個動議嘅工聯會議員郭偉強，到時變咗要對住空櫈兼空氣講嘢。
官員回應立法會質詢同動議係天經地義之事，但政府竟然喺日前回覆立法會，話已知會立法會秘書，唔會有官員出席由郭偉強提出，「討論對下任行政長官期望」嘅動議辯論，簡直離晒大譜。政府當然係例牌無解釋原因啦，但有人就覺得，係因為三個司長之中，鬍鬚曾辭咗職，林鄭又可能好快辭職，咁下低嘅局長有邊個可以代表回應呢？於是索性唔派人出席。
基本責任都做唔好 議員鬧爆
有份提修正案嘅公民黨楊岳橋就大鬧，立法會係民意機關，而議員對特首期望係茲事體大，反映現屆政府嘅官員連基本責任都做唔好，就算主要官員唔出席，搵政制及內地事務局局長譚志源嚟一嚟都唔係問題。
另一個提修正案嘅林卓廷就批評政府不知所謂，官員連回應立法會質詢嘅基本職責都唔做，出糧畀佢哋做乜？佢又話最諷刺係呢個係建制派議員提出嘅動議，政府都選擇唔聆聽、唔回應，呢個政府明顯尸位素餐，等落台喇！
譚志源上屆坐足全程有發言
其實，對下任特首期望嘅議案都唔算係乜嘢敏感議題，好似六年之前，上屆特首選舉前夕，有民主派議員都試過提「呼籲有意參選行政長官的人士回應市民訴求」動議，而當時政府都派咗政制局局長譚志源出席會議兼發言，仲坐足全程添，所以政府拒絕派官員出席今次嘅動議辯論確實係有唔同嘅對待，咁亦證明呢個「跛腳鴨」政府，真係做少少嘢都唔靈囉！