中環出更：象嫂玩踢爆 象哥聞「偷食」好騰雞
工聯會每年都會為獨居長者搞團年宴，尋日就舉行咗今年第一場團年宴，工聯會會長林淑儀（象嫂）當然要到場喇，連佢老公、立法會議員黃定光（象哥）都有陪同出席添！雖然有象哥傍住，但象嫂竟然話象哥可能偷食都未定喎。吓！到底搞乜？
其實象嫂講緊係偷食肥豬肉，但已令象哥好緊張，指偷食好易令人諗錯隔籬（口架）！因為三高問題，象嫂一早下令象哥戒口，而象哥就話呢三個月瘦咗成四公斤。成績似乎唔錯噃！象哥透露，全靠每日食少一餐令胃口細咗，所以依家連頸喉鈕都扣到，直言着衫比以前好睇同整齊添！
麥美娟預告增磅
不過新年將至，怕唔怕食得太多糕而磅數反彈呢？形容自己「乜糕都鍾意食」嘅象哥就話，今年開始會食少啲糕，但象嫂就好似仍未滿意，話象哥要戒埋煙先「Very Good」喎。
另一議員麥美娟（Alice）同樣鍾意食糕，更話蘿蔔糕要煎得脆、年糕要多蛋汁。咁高要求但竟然從來唔使自己出手，真係令人羨慕！Alice仲話屋企每年都有幾底蘿蔔糕同年糕，但從來都唔浪費食得晒，難怪佢話新年實會增磅喇！
講起浪費食物，叙福樓集團執董黃傑龍就話食肆搞任食反應熱烈，但分分鐘會損害公司形象喎。佢解釋，若然人手不勝負荷，上菜速度過慢會得失客人。另外，唔少客人趁任食就不停落單，更有客人浪費太多食物而被罰錢，所以都會破壞同客人關係，有見及此，佢就主張由教育同獎勵入手去改善呢個現象。
議員何啟明今年有份籌備團年宴，佢話舊年經濟較差，搵贊助難度大增，所以今年無法招待傷健人士。但經努力爭取下，所有參加者都可獲福袋一個，可以滿載而歸咁話。
卓妮