政情：拒做顧問 盛智文請葉劉食檸檬
已宣布參選特首選舉嘅新民黨立法會議員葉劉淑儀，繼日前瞓模擬「棺材房」被「惡搞」後，尋日更被選委之一、海洋公園前主席盛智文請食「檸檬」，澄清自己唔係葉劉嘅競選辦特別顧問。慘食檸檬嘅葉劉就死撐話盛智文係有答應過，仲話佢係「Free to change his mind（有自由改變主意）」，會尊重佢嘅決定。
回帶到大半個月前葉劉宣布參選當日，佢喺參選大會上提及，多謝盛智文為佢擔任競選辦特別顧問。但尋日盛智文就澄清，話自己當日聽到葉劉話佢擔任競選辦特別顧問都覺得好驚訝。佢仲話自己係坐觀眾席嘅普通人物，如果係顧問，就會同葉劉一齊企喺台上。佢仲透露，自己曾同葉劉講過，唔可以幫佢做顧問。另一邊廂，葉劉回應時就死撐，話盛智文應承咗上台介紹自己，仲肯定應承佢成為競選團隊嘅一分子，但個名銜就仲未搞清楚喎。