政情：傳林作謀入公文袋 出戰九西
有「港姐男友」之稱嘅大律師林作喺參選區議會敗陣後更積極喺政圈發展，佢之前曾加入走中間路線嘅民主思路成為青年團隊成員，但近日盛傳佢有意轉投公民黨（公文袋），仲喺一個論壇上公開向該黨主席梁家傑（袋巾傑）拜師添！
主動與袋巾傑攀談
林作日前就同袋巾傑一齊出席大學論壇，聽聞林作一見到佢就主動攀談，唔單止同佢大呻喺民主思路不受重視，仲提出要加入公文袋添！佢當時就話，加入該黨都有一定機制，需要留喺支部一年，再經執委會同意先會成為黨員，但佢都好歡迎有新人加入。
據知，林作想加入公文袋，除咗因為同為大狀同聲同氣，更因為佢睇準公文袋未來有意派人出選由宣誓風波引發嘅九西補選，但暫未有人選，所以覺得入黨之後以自己知名度出選機會會大增。不過，以林作嘅往績，佢通常都係「口行行、大隻講」，究竟佢係玩玩下定有心從政，真係要拭目以待喇！