政情：審議官員加薪譚志源叫「加鐘」 波哥唔賣帳
政制事務委員會上個月通過無約束力動議，否決將下屆問責官員加薪嘅議案交上財會，但政制及內地事務局局長譚志源懶理，照交個議案上財會。泛民眼見政府硬闖就揚言發動全面拉布，但譚志源仍然死心不息，開天索價要財會今個禮拜五連開六小時會議，焗財會通過撥款！但主席陳健波（波哥）權衡輕重後，淨係批准加會兩個鐘。
僅獲加會兩粒鐘
秘書處尋日發信畀財會委員，預告禮拜五要連開兩節會議，下午三點開到夜晚七點，處理官員加薪撥款項目，期間譚志源都會陪議員們坐足全程。波哥仲話，當局本來要求佢哋禮拜五要連開三節，合共六小時嘅會議，但佢就覺得無實際需要，最終都只批准加會兩小時，而譚志源嘅如意算盤咁就打唔響喇！其實你咁「狼死」，加兩個鐘會都已經畀足面喇！
波哥又話官員加薪議案係爭議性議題「好多人都有意見」，加上泛民議員揚言發動全面拉布，估計佢哋會用盡方法阻止議案通過，包括唔經預告就提出動議議案嚟拉布。但佢就覺得議程後面都冇其他重大議題，所以主持會議時都會採取「較寬鬆做法」，只要議員言之有物、無離題、無重複，都會畀議員慢慢講，仲講明除非「拖足幾個禮拜都仲拗緊」否則都唔會輕易剪布。
譚局長，你都係守吓規矩，等吓啦！