政情：甘淪老美反華工具民主阿婆攞嚟衰

為唱衰香港 邏輯盡失

民主阿婆向傳媒表示，自己獲邀到美國華府出席今個月二十日舉行嘅特朗普就職儀式，仲話自己係首次參加美國總統就職儀式「對此表示高興」。但呢位時刻都自稱擁抱普世價值嘅民主阿婆似乎就無乜邏輯，明明特朗普嘅醜聞已浪接浪，先被美國傳媒揭發佢肆無忌憚咁走入女更衣室睇人換衫、涉嫌性騷擾、恐嚇租戶同埋僱用非法移民黑工，但民主阿婆仲好天真話自己樂意向美方反映香港近況，希望新政府繼續支持香港發展民主，捍衞香港嘅自由同法治。好明顯民主阿婆為咗唱衰香港同博出位，真係唔理好醜。

除要黐特朗普外，仲有乜搞作？民主阿婆回應傳媒時話此行想了解新政府對「一個中國」有乜睇法。其實睇番特朗普一當選，就公開宣稱話美國未必繼續遵守「一個中國」嘅原則，仲背棄美國近四十年嘅對台禮節，直接同台灣嘅總統蔡英文進行電話通話，行為舉措都只係要表達佢上任後嘅對華政策將會有大變動，民主阿婆係咪想偷師，學佢點樣反華？

反觀之前多屆美國總統就職，從來無邀請香港嘅民主派代表出席，特朗普今次破格邀請已經冇晒政治能量嘅民主阿婆出席就職儀式，政治上令人質疑只係要激嬲北京同表達佢嘅反華方針，但民主阿婆就好似受寵若驚咁，以為人哋睇得起、當佢係官方代表而沾沾自喜，連可能將佢變成美國嘅反華工具都唔知。

外訪自取其辱有前科

其實民主阿婆舊年飛過去澳洲同新西蘭，仲乞求兩地政府干預香港內政，唯恐香港不亂，去到新西蘭時就被當地官員「放飛機」兼請食閉門羹，拒絕同佢見面。但佢被人冷待亦有前科，一四年時佢亦曾厚住面皮到英國，但不獲時任英國首相卡梅倫接見，最後老羞成怒鬧爆英方希望同中國喺貿易、文化等愈來愈密切嘅同時，都不應犧牲香港利益，最後就當然無人理佢啦！佢睇到自己咁大，呢次去美國最終可能又係自取其辱啫！