中環出更：22人快閃示威 轟漢奸黎「走狗」
繼日前一批示威者到壹傳媒黎智英（漢奸黎）位於何文田嘅寓所附近示威，直斥漢奸黎係「番邦契弟」之後，尋日再有為數二十二名聲稱自發嘅人士到上址快閃示威，轟漢奸黎係走狗，要求佢滾出香港。
高呼「滾出香港」
聲討漢奸黎嘅行動未因禁制令頒下而停止，尋日下晝約三時二十分，一批示威者先到達漢奸黎寓所附近嘅行人路上聚集，約一小時後集齊人，便開始叫口號示威，直斥漢奸黎「黑媒禍港，禍延下一代」、「走狗黎智英，滾出香港」，期間示威者未有舉起任何橫額或標語。警員到場了解，至下晝四時半左右各人和平散去。
近期針對漢奸黎嘅示威行動不絕，自舊年六月十日起計，至今已踏入二百一十四日，連同尋日嘅行動在內，到漢奸黎寓所及將軍澳壹傳媒大樓外示威嘅行動最少達一百一十八次，當中自稱霸王國際集團員工及苦主佔十次、正義聯盟佔三次，旅遊業界及其他人士則有一百零五次。
卓妮