中環出更：D嘜×AR創意目錄顯商機
科技愈來愈發達，平面嘅嘢好多時已經滿足唔到大眾觀感，唔單止睇戲打機，就連出本好似黃頁咁嘅指南都要超越平面！尋日香港工業總會（工總）轄下嘅香港設計委員會舉行「香港D嘜設計認證」（D-Mark）頒發典禮，見佢哋本「香港D嘜設計標誌」目錄表面貌似平平無奇，但原來係用咗擴增實境（Augmented Reality，簡稱AR）嘅技術製作，只要用手機對準頁面即刻會出現短片及立體圖像，恍如一個個迷你展示室。
香港設計委員會主席嚴志明話呢種技術已經有好多年，好似佢哋做家具行業，公司幾年前已經開始沿用，以前規劃一個場地可能要出好多張3D圖，用咗呢種技術就唔再需要，只要透過手機就可以旋轉咁睇到個場多個唔同角度嘅效果。但大眾對新事物好快厭倦，對設計行業有冇影響？佢就認為一個好嘅設計係歷久常新，唔係功能有幾多幾新，而係有幾切合用家需要，好似一啲經典設計師坐椅咁，坐幾多年都係咁舒服兼永不過時。
工總主席鄭文聰就話D嘜所推廣嘅除咗係產品上嘅設計，仲係一種意念同思想上嘅創新。佢自己都好鍾意試新嘢，好似電動車咁當年就一試愛上，連太太都好鍾意，又指新嘅鷹翼車門設計方便長者上落，笑指都係為爸爸着想先買呢部車喎！
孫榮聰陳嘉賢籌備新組織
同場仲有「變形金剛之父」稱號嘅工業家林亮同孫仔林凱章、工總青委名譽會長孫榮聰等。原來孫榮聰最近與工總青委名譽會長陳嘉賢籌備緊一個新組織幫一班傳統工業界，發展O2O營銷模式，事關佢哋發現好多傳統工業喺轉型及網絡營銷方面遇上問題，大家集思廣益加上一啲呢方面有經驗嘅人士幫手，發展網上平台就可以更得心應手。
卓妮