香港話就話係購物天堂，其實係冒牌天堂至真。呢，本港海關公布早前聯同美國海關打擊跨境冒牌活動，檢獲千多件由香港出口美國嘅懷疑冒牌電子產品，總值過百萬元。香港老翻基地呢個朵響到去美國，都咪話唔羞家。
不過咁都未算最羞家呀，話說尋日法庭審理一單出售冒牌勞力士手錶嘅畸士，被告唔係咩地痞流氓，亦唔係咩犯罪集團成員，而係一個本應除暴安良嘅警員，問你服未。代表律師話被告早前從網上平價購入一隻勞力士，懷疑係假貨，於是喺網上放售，即係搵水魚接貨啦，點知好衰唔衰被海關放蛇斷正，最終被判八十小時社會服務令。
正所謂己所不欲，勿施於人，身為警員知法犯法不特止，仲衰到自己買咗假嘢就搵替死鬼墊底，呢啲警員唔止羞家，簡直係敗類。不過諗落又唔出奇嘅，家陣嘅警隊良莠不齊，泥沙俱下，例如前排轟動全城嘅警司性騷擾女下屬、傳淫照、警署作陽台、老屈智障漢殺人、受賄洩密等等，只有想不到，沒有做不到，賣假貨都算係小兒科囉。呢，最近又有立法會議員接獲市民求助，聲稱被警方誣告強姦，雖然後來證實無辜，但警方依然老屈佢詐騙，你話呢個係咩世界吖！
所以話，海關幾努力打假都冇用，事關堡壘最易從內部攻破，警隊就係全港最大嘅冒牌貨。冇誇張o架，大家上警隊個網頁睇吓咪知囉，雞乸咁大隻字寫住「服務為本，精益求精」，又話「維護法紀，你我承擔」，根本就係名不副實，否則警方知法犯法嘅醜聞點會長爆長有，投訴警察嘅數字點會年年飆升，警隊民望又點會係眾多紀律部隊嘅包尾大幡吖。
講起就唏噓咯，上世紀六、七十年代，警隊貪污成風，砌生豬肉屢見不鮮，「有牌爛仔」呢個朵就係咁嚟。後來港英政府成立廉政公署，經過多年努力，終於成功令警隊洗底。點知百年養不足，一朝毀有餘，回歸都未夠二十年啫，警隊執法水平就倒退返去舊陣時，仲衰到畀人叫「黑警」添，你話警隊內部管理唔係出咗問題都冇人信喇。
始終都係嗰句嘞，物必先腐而後蟲生。警隊由上爛到下，由內爛到外，香港治安想唔烏煙瘴氣都幾難，咁就難怪由本地幫到南亞兵團再到貴州幫都唔將警隊放喺眼內，頻頻做世界嘞。一節見則百節知，警隊腐爛透頂不過係港府禮崩樂壞嘅縮影咋，港府冇神經冇靈魂，港產官僚有正經事唔做，日日掛住擦鞋獻媚，結果咪添煩添亂，搞到香港家嘈屋閉，無日安寧咯。