港產官僚常將好事變壞事，究其因，無非以為自己真係「好打得」，於是自把自為，以為真係做到神不知鬼不覺，「滴水不漏」，但到頭來又引發爭拗，官到無求膽自大，顯然更易在政策上判斷錯誤，低估「滴水」一漏，便激起千層浪！
冇錯，老朽所指的便是政務司司長林鄭月娥為了在西九文化區建故宮博物館，事前未作公眾諮詢，便推翻西九原本嘅規劃，是否高官想點就點？明明西九大型表演場地以為只待開工，誰知林鄭就乾坤大挪移變成故宮館，阿姐，老朽酷愛文學，為何又不可以要求建個好似北京嘅現代文學館，畀啲尊嚴作家又得唔得？
所以話，凡事不患寡而患不均，港產官僚要建故宮館，其實大家都心知係好事，因為北京故宮藏品太多，大大話話不下八十萬件，若然挑一百幾十件來香港展覽，已是相當吸引外地遊客來港一遊！可是，政府冇理會音樂文化界等嘅感受，繞過立法會，以為得到馬會撥款興建就掂！好，就算音樂文化表演界肯「讓路」，然而，之前嘅諮詢難道就咁作廢？
點講都好，這件事港產官僚在處理上實有程序錯誤，西九文化區工程一再延後，其實，都唔爭在把改建用途提上立法會討論及經公眾諮詢，「廟堂之上言理，則天子不得以勢相奪」，既然是中央對港的厚愛，市民若覺得建故宮館好過建大型表演場，高官大可據理力爭，通過諮詢廣集民意才拍板，何須怯於非建制派的反對？
港產官僚膽自大，做大事卻未能「慎終於始」，最終令中央「吃死貓」，令人覺得只要是從北京來的，便要接受。事實上，中央冀望下一屆行政長官要有管治能力，說白了，就是要有能力減少社會矛盾，促進和諧，無奈如林鄭的「膽自大」，只會為香港添煩添亂，一個西九建故宮館都搞到一鑊泡，還是退下來咬長糧享天倫吧！