政情：憂失議席 區議員讀社工自保
下屆區議會選舉料於二○一九年舉行，前年底首次當選沙田區議員、早前退出新民主同盟嘅陳兆陽（Billy）疑未選就打定輸數，提早憂慮或議席不保，佢自爆早排已報讀社工碩士課程，既可以自我增值，亦為自己留定條後路。
Billy話，距離下屆區選有約三年時間，但最近潛在對手已經喺區內出現，自言因而增加唔少危機感，佢同時又透露已報讀社工碩士課程，一來方便自己有更多專業知識，處理街坊之間嘅糾紛及家庭問題，亦可以為將來做好打算。
拒再幫人補選拉票
仲記得Billy喺舊年九月立法會選舉，因為於新界東直選協助新民主同盟以外嘅候選人，最後退黨收場。對於未來會唔會再加入其他政黨，Billy話暫時唔會考慮，又直言「見過鬼都怕黑」，因此唔打算再幫助任何人，於日後舉行嘅新界東直選補選中拉票喎。