政情：金發局自身難保 聘CEO半天吊

泛民鬧爆 下屆特首或殺局

立法會人事編制小組委員會尋日討論金發局開設CEO職位，職級相等於首長級薪級第二點嘅非公務員職位，年薪二百幾萬元，任期三年。由於今屆政府喺七月換屆，換屆後CY設立嘅諮詢組織係咪存在都未知，泛民議員喺會上群起質疑，其中陳志全就問︰「金發局係一屆貨仔，定千秋萬世？點解依家就要？三月廿六號（特首選舉投票日）後再討論會唔會好啲？」

另一議員鄺俊宇亦話金發局本來就係「架床疊屋、架局疊局」，CY落台後仲存唔存在都唔知，質疑當局唔應該依家就話要請人；議員朱凱廸亦質問劉怡翔，如果新特首唔接受呢個模式，係咪就可以取消金發局，直言「唔想留條尾巴，請個人三年，令下屆特首好難搞」。而議員郭家麒更加拉埋劉怡翔落水，話劉怡翔「新班子上場，你閣下都未必留任啦」，認為依家就設立年薪成幾百萬嘅職位，「咁樣用公帑係好難接受」。

劉怡翔死撐要睇市場支持

面對泛民你一言、我一語，劉怡翔惟有死撐話金發局運作唔係睇政府任期或者邊個做特首，而係要睇市場支唔支持金發局嘅工作，又話之前都有議員認為金發局要盡快聘請CEO云云。

之不過，建制派並唔同意泛民嘅看守政府論。其中議員陸頌雄批評泛民為反對而反對，揶揄泛民至今仍「抽梁振英水」，認為大家應對事不對人；批發及零售界議員邵家輝亦話，當局係有需要先到立法會申請開位，「唔係都唔會走上來畀議員糟質」，所以佢會支持建議。但到會議完結，小組仍未就開位建議進行投票。

金發局請CEO半天吊，該局嘅工作都要繼續嘅，佢哋尋日就話若果本港可以修改目前對部分金融機構唔平等嘅稅務處理，有助吸引更多金融機構來港發展，仲話稍後會同稅務局商討建議添！