中環出更：創業者聚首 做善事互扶持
創業之路好多時都係孤獨嘅，遇到困難又唔知可以點同人講，早前一班本地創業者就組成咗一個叫「香港人撐香港品牌」嘅組織，除咗交流創業時面對的難處外，仲集合一班成功創業者嘅力量做善事積極回饋社會。卓妮見到陽光洗衣集團總監江麗萍都係其中一員，講起佢哋有次做義工回收舊衫，竟然兩日就收到幾噸衫，正頭痛唔夠人手洗衫嘅時候，組織竟然就即刻搵到一大班義工嚟幫手，所以話呢班創業者除咗有心做善事之外，號召力仲好強。
話說呢個組織本來只係一個facebook群組，由一小群創業者聚集埋一齊互相學習同扶持，到規模漸大希望調返轉角色幫番其他有需要嘅人。但隨住本地生產成本增加，過往幾十年好多本地品牌移師外地，主席胡建東希望可以重新建立番香港品牌嘅凝聚力，以及將資源用於幫助年輕創業者同社區。
e-banner創辦人陳剛雄席上分享，平日工作不時出席好多唔同聚會，大家總會叫好多食物，好似早幾日佢就打包咗九盒食物，並喺回家途中轉送畀露宿者，又試過路經球場時發現有退役足球員與一班智障人士踢波，自己睇見好感動，於是加入一齊踢，先發現原來平日對呢班有需要嘅人關心，比起大時大節先做慈善來得更實際，亦因此有意多作義務工作。
謝寶達整龜苓膏悟品牌重要性
同場仲有「舖王」鄧成波兒子鄧耀昇、遵理學校創辦人梁賀琪、鴻福堂主席謝寶達等。謝寶達分享創業經歷時，笑言創業初期最常見被「睇死」，好似當年佢就曾被指唔識整龜苓膏，整完被指唔好食，後來將自己整嘅龜苓膏放入其他品牌嘅碗入面即被認同，因此明白品牌有幾重要。
卓妮