政情：公民講場：高永文跟隊倒米墟市公聽會失蹤

立法會墟市事宜小組委員會尋日舉行公聽會，就農曆新年墟市政策聽取團體及市民意見。委員會原本邀請咗食物及衞生局局長高永文出席，但高永文尋日就唔見影，只係派咗食衞局首席助理秘書長黃淑嫻，同埋食物環境衞生署助理署長林永康出席。出席會議嘅公眾人士就批評高永文唔重視墟市發展，對高永文感到失望同遺憾。之前立法會就橫洲風波舉行公聽會，當時運輸及房屋局局長張炳良同發展局局長陳茂波都缺席，佢哋已經畀人鬧爆，估唔到高永文冇吸取教訓，仲要有樣學樣。政府唔做嘢已為人詬病，仲好意思建議問責局長加人工，高永文今次仲唔係幫手倒米？