政情：今日你上鏡：吳永嘉「惜」食 示範炒蘿蔔皮

蘿蔔皮都食得？尋日立法會議員吳永嘉參加工展會會場內一個名廚齊惜福活動時就處男煮餸，炮製佢人生第一道菜式「脆炒蘿蔔皮」，估唔到揸起鑊剷上嚟都有板有眼，有啲天分喎！佢笑言平時甚少下廚，淨係煮過公仔麵同煎蛋。呢日大會主力宣揚善用剩食嘅概念，佢就專登上網搵食譜，諗到嚟緊新年好多人會整蘿蔔糕，批走大量蘿蔔皮好浪費，於是就用嚟煮餸，原來係食得仲好有益添！佢加埋紅蘿蔔絲同牛蒡絲一齊用麻油炒，連名廚周中都讚好味。