政情：地政總署錯認阿廷功能界別
繼教育局後，輪到地政總署甩轆，將直選寫錯係功能界別嘅議員。講緊嘅係民主黨（白鴿黨）立法會議員林卓廷（阿廷）。
自嘲知名度低致搞錯
阿廷之前被兩名入稟高等法院提司法覆核嘅市民錯寫成「林桌廷」，點知事隔唔夠半個月再中招！佢喺facebook公開一封由地政總署寄畀佢嘅信件，內容為佢申請喺路邊展示宣傳品嘅位置安排，信中竟然被寫成「功能界別立法會議員」，搞到新界東地區直選出身嘅佢哭笑不得，留言「寸爆」該署，反問自己應屬於邊一個功能界別。
阿廷回覆本報時自嘲知名度低，所以名同職銜經常被人搞錯，希望日後做到卿姐（劉慧卿）嘅級數，到時就無人敢錯。
其實，政府部門甩轆寫錯議員界別早有前科，好似被嘲為「吳得掂」嘅教育局局長吳克儉喺九月寄畀街工梁耀忠嘅當選祝賀信，佢明明喺區議會功能界別（第二）當選，但教育局就認錯佢係教育界議員，而當時離選舉結束只係一個禮拜，都叫情有可原，但係新一屆議員已宣誓就職逾兩個月，地政總署實在難辭其咎。地政總署回應我哋查詢時，承認係手民之誤，仲向阿廷道歉，睇嚟佢都應該順番條氣喇！