政情：卸膊吳得掂 放長假博亂
教育局局長吳克儉（吳得掂）民望長期包尾，做乜都唔得掂，由上任時鬧出國民教育風波，到早前小三全港性系統評估（TSA）事件，以至最近被申訴專員公署踢爆教育局喺幼稚園超收報名費問題上把關不力，不斷備受批評，吳得掂本人自然就責無旁貸。依家TSA到底要唔要復考？幼稚園超收報名費到底要點樣拆彈？全部問題都未解決之際，被批評係「外遊局長」嘅吳得掂又休假，將手頭上嘅工作再次卸畀副手處理。
被叫下台 仲呻外遊辛苦
政府上周五刊憲，公布吳得掂由今個月二十二號起會開始休假，休到出年一月五號，年尾放足十四日先再返工，期間由教育局副局長楊潤雄署任。大眾都好關心TSA到底會點樣安排，佢新聞秘書回覆查詢嘅時候，話局長本身就有二十日假期，今次休假係屬私人性質，事前無透露自己會去邊度，而吳得掂喺休假期間亦會繼續同副局保持溝通喎！回覆中又強調政府有完善嘅署任制度，唔會影響教育局嘅正常運作。局長連休假都唔交代自己去邊，莫非吳得掂今次已經做定生涯規劃，要休假去見工？
其實上屆立法會就TSA舉行公聽會時佢已經以私人理由缺席，事後仲自爆去咗日本睇紅葉！而吳得掂上任以嚟又經常外訪，所以被外界批評係「外遊局長」，仲有人叫佢下台添。之但係佢竟然仲呻外遊辛苦。
楊偉雄譚志源亦放假
申訴專員公署前日就踢爆教育局，喺幼稚園超收報名費問題上把關不力，令多間幼稚園喺過去八年向每名報名學生收取一千至三千幾蚊報名費，有幼稚園透過收取報名費，錄得過百萬盈餘，仲形容事件係「匪夷所思」；另一方面，TSA委員會（基本能力評估及評估素養統籌委員會）早前建議教育局出年全面復考TSA，教育局最遲下月中就要拍板決定復唔復考，喺呢段時間教育局上上下下都忙到甩轆，身為一局之首竟然走去放假？唔通佢外遊成癮？
除咗吳得掂之外，創新及科技局局長楊偉雄尋晚隨團到北京公幹，公幹結束後就放假，而政制及內地事務局局長譚志源亦都放十幾日，認真梳乎！