中環出更：怕咗新空管 梁繼昌唔搭飛機
民航處全面啟用新空管系統之後問題多多，鬼機、航班消失等問題搞到人心惶惶。立法會會計界議員梁繼昌（Kenneth）都好關注有關問題，佢話自己對新空管系統完全無信心，會等系統運作至少一年，觀察吓佢運作成點先會再搭飛機，以免人身安全受威脅。
稱至少要觀察一年
Kenneth話自己一向有聖誕外遊嘅習慣，而且每兩個月都要搭飛機去公幹。不過，新空管系統啟用之後，佢索性取消所有外遊，而連帶外地公幹都改以視像電話代替。佢覺得新空管系統啟用之後事故多多，令人失去信心，佢會觀察至少一年，睇吓新系統運作成點，先再決定會唔會再搭飛機，始終命仔緊要呀！
本身係立法會政府帳目委員會副主席嘅Kenneth又話，自己一直有喺會上跟進新系統嘅問題，佢日前已去信用同一系統嘅杜拜機場，了解一下當地係咪已經棄用新空管系統嘅電子紙條系統及當中嘅問題，佢相信杜拜方面好快會回覆，希望可以搵出方法，去改善新空管系統。
卓妮