政情：貝鈞奇期望培訓香港「球星」
載有巴甲球隊查比高恩斯球員嘅航機早前發生意外墜毀，傷亡嚴重，香港足球總會副主席貝鈞奇形容係一個球壇悲劇。佢話呢隊球隊喺近幾年連跳兩級，短時間內由較低級別躍升成為甲組球隊，成績一鳴驚人，更打入南美盃決賽，絕對稱得上係神奇球隊，奈何世事不如人意，令人非常傷心。
近年較少帶隊出賽
貝鈞奇以前不時都會帶球隊出外作賽或集訓，但近年相對少咗，傾向交由專業嘅領隊同教練帶隊。對於發生如此震撼嘅不幸事件後，日後會唔會考慮外出比賽時安排球員分批乘坐唔同航班呢？佢就認為咁嘅做法機會較細，因為通常球員都係搭埋同一班機去，除非係其他內部成員或者好似佢哋去觀賽咁，因為有其他工作先會遲啲去到。而且分批前往嘅話無論喺訂機票同其他安排上都會變得非常繁複。佢又話知道元朗足球會有球員因為曾經同查比高恩斯球員一齊受訓而特別傷心，佢都有表示慰問。
講番香港足球現狀，佢認為華人球員始終都未出到一位球星級球員，需要加強訓練工作，打好球員基礎。但亦指「弱隊出龍門」，葉鴻輝就係其中一位突出嘅守門員嘞！